તા.૨૬.૦૯.૨૦૨૫: કમર્શિયલ ટેક્સ પ્રેક્ટિશનર્સ એસોસિયેશન જામનગર દ્વારા તાજેતરમાં લાગુ થયેલ જી.એસ.ટી. ૨.૦ બાબતે દેવ ભૂમિ દ્વારકાના સાંસદ પુનમબેન માડમને રજૂઆત કરી છે કે જી.એસ.ટી. 2.0 (GST 2.0) અમલમાં આવ્યા બાદ નાના વેપારીઓ અને દુકાનદારો માટે અનેક મુશ્કેલીઓ ઊભી થઈ રહી છે. એસોસિયેશનના પ્રમુખ અક્ષત વ્યાસે જણાવ્યા મુજબ સરકાર દ્વારા કરેલ કરમાં કપાત અર્થવ્યવસ્થાની દ્રષ્ટિએ સારી છે, પરંતુ તેની અમલવારીમાં સ્પષ્ટતા અને માર્ગદર્શનના અભાવને કારણે નાના વેપારીઓ પર વધારાનો ભાર આવી રહ્યો છે.
૧. કોમ્પોઝિશન સ્કીમમાં નાની દુકાનોની સમસ્યા
દેશભરના અંદાજે 30થી 40 લાખ નાની દુકાનો કોમ્પોઝિશન સ્કીમ હેઠળ છે. આવા વેપારીઓને તેઓ ખરીદેલા માલ પર ચૂકવેલા જી.એસ.ટી.નો રિફંડ મળતો નથી. હવે જી.એસ.ટી. 2.0 હેઠળ નવા દરો લાગુ થયા બાદ, આ વેપારીઓ પાસે જુના દરે ખરીદેલું સ્ટોક હોય તે સ્વાભાવિક છે. જો તેઓ જૂના દરે જ વેચે તો ગ્રાહકોને માલ મોંઘો લાગે અને **પ્રોફિટિયરીંગ (અતિશય નફો કમાવવાનો આરોપ)**ના કેસનો ખતરો ઊભો થાય છે.
રજૂઆતમાં વેપારી તરફે એસોસિયેશનની માંગ કરવામાં આવી છે કે –
સરકાર તરફથી સ્પષ્ટ સર્ક્યુલર આવે કે નાના વેપારીઓ જુના સ્ટોક વેચતા કોઈ કાર્યવાહીનો કરવામાં આવે નહિ. .
સાથે જ, ગ્રાહકોમાં જનજાગૃતિ અભિયાન ચલાવવામાં આવે કે “કોમ્પોઝિશન ટેક્સેબલ પર્સન”ની પરવાનગી ધરાવતા દુકાનદારોને થોડો સમય ભાવ ઘટાડવામાં આપવામાં આવે.
૨. જી.એસ.ટી. લાભ આપવાની પદ્ધતિ અંગે ગેરસમજ
ઘણી કંપનીઓ જેમ કે સોપ, બિસ્કિટ જેવી રોજબરોજની વસ્તુઓ બનાવતી કંપનીઓએ ભાવ ઘટાડવાને બદલે વધુ પ્રમાણમાં માલ આપીને લાભ આપવાનું શરૂ કર્યું છે. ઉદાહરણ તરીકે, રૂ.50માં મળતો 100 ગ્રામનો સોપ હવે 110 ગ્રામનો મળી રહ્યો છે. પરંતુ ઘણા ગ્રાહકોને આ ફેરફાર સમજાતો નથી અને તેઓ “ભાવ ઓછો થયો નથી” એવી ફરિયાદ કરે છે.
વેપારીઓ તરફે એસોસિયેશન દ્વારા માંગ કરવામાં આવેલ છે કે –
સરકાર જાહેર કરે કે વધારું પ્રમાણ આપીને પણ કંપનીઓ ગ્રાહકોને લાભ આપી રહી છે.
આ અંગે પ્રચાર અભિયાન ચલાવવામાં આવે.
પેકિંગ પર સ્પષ્ટ લખાણ જેમ કે “નવી GST દર મુજબ 10% વધારું મફત” લખાવવાનું પ્રોત્સાહન આપવામાં આવે.
૩. ફરિયાદોની ન્યાયી વ્યવસ્થા
ગ્રાહકોને ફરિયાદ કરવાનો હક આપવો સારી વાત છે, પરંતુ ગેરસમજને કારણે સાચા વેપારીઓ પર અયોગ્ય કાર્યવાહી ન થાય તેની ખાતરી કરવી જરૂરી છે. એટલા માટે કોઈપણ ફરિયાદની પ્રાથમિક ચકાસણી કર્યા બાદ જ કાર્યવાહી કરવામાં આવે તેવી એસોસિયેશને માંગણી કરી છે.
એસોસિયેશનનું માનવું છે કે આ સૂચનો અમલમાં આવે તો GST 2.0 વધુ સરળ, વ્યવહારુ અને નાના વેપારીઓ માટે અનુકૂળ બનશે.
