દીવ ખાતે ઇન્કમ ટેક્સ અને જી.એસ.ટી. ના વિષયો ઉપર રેસીડનશિયલ રીફ્રેશર કોર્સનું થયું આયોજન
એઆઈએફટીપી વેસ્ટ ઝોન અને ગીર સોમનાથ ટેક્સ બાર એસોસિએશન દ્વારા દીવ ખાતે સફળ રેસિડેન્શિયલ રિફ્રેશર કોર્સનું આયોજન
દીવ, તા. 14 જૂન, 2026: ઓલ ઈન્ડિયા ફેડરેશન ઓફ ટેક્સ પ્રેક્ટિશનર્સ (AIFTP) પશ્ચિમ ઝોન તથા ગીર સોમનાથ ટેક્સ બાર એસોસિએશનના સંયુક્ત ઉપક્રમે તા. 12 થી 14 જૂન, 2026 દરમિયાન દીવ નજીક આવેલ ફ્લેમિંગો ક્લબ એન્ડ રિસોર્ટ ખાતે ત્રણ દિવસીય રેસિડેન્શિયલ રિફ્રેશર કોર્સ (RRC)નું ભવ્ય આયોજન કરવામાં આવ્યું હતું. આ કાર્યક્રમમાં દેશના વિવિધ વિસ્તારોમાંથી આશરે 70 જેટલા ટેક્સ પ્રોફેશનલ્સે નોંધણી કરાવી ઉત્સાહપૂર્વક ભાગ લીધો હતો.
આ રિફ્રેશર કોર્સ એઆઈએફટીપી પશ્ચિમ ઝોનના ચેરમેન સીએ અક્ષય મોદીનું વિઝન હતું, જ્યારે એઆઈએફટીપીના ઇમિડિયેટ પાસ્ટ પ્રેસિડેન્ટ એડવોકેટ સમીર જાનીના માર્ગદર્શન, આયોજન અને અવિરત પ્રયત્નોના પરિણામે કાર્યક્રમને ભવ્ય સફળતા મળી હતી.
કાર્યક્રમમાં એઆઈએફટીપીના પૂર્વ પ્રમુખ એડવોકેટ નિકિતા બધેકાએ ગેસ્ટ ઓફ ઓનર તરીકે ઉપસ્થિત રહી કાર્યક્રમની શોભા વધારી હતી. તેમણે પોતાના સંબોધનમાં ટેક્સ ક્ષેત્રમાં સતત અભ્યાસ અને અપડેટ રહેવાની આવશ્યકતા પર ભાર મૂક્યો હતો.
ટેકનિકલ સત્રોમાં પ્રતિષ્ઠિત વક્તાઓએ મહત્વપૂર્ણ વિષયો પર માર્ગદર્શન આપ્યું હતું. પુણેના જાણીતા GST નિષ્ણાત સીએ સ્વપ્નિલ મુનોટે GST કાયદાની કલમ 74A અંગે વિસ્તૃત અને વ્યવહારુ માર્ગદર્શન આપ્યું હતું. તેમણે આ જોગવાઈના કાનૂની પાસાઓ, પ્રક્રિયાત્મક મુદ્દાઓ તથા તેના વ્યવહારુ અમલ અંગે ઊંડાણપૂર્વક ચર્ચા કરી હતી.
અમદાવાદના એડવોકેટ વિવેક ચાવડાએ આવકવેરા કાયદા હેઠળની Presumptive Taxation Scheme અંગે પોતાના અનુભવો અને વ્યાવસાયિક દૃષ્ટિકોણ સાથે માર્ગદર્શન આપ્યું હતું. નાના વેપારીઓ અને પ્રોફેશનલ્સ માટે આ જોગવાઈઓના મહત્વને તેમણે સરળ ભાષામાં સમજાવ્યું હતું.
આ કાર્યક્રમમાં ટેક્સ ક્ષેત્રના અનેક વરિષ્ઠ અને પ્રતિષ્ઠિત સભ્યો પણ ઉપસ્થિત રહ્યા હતા. જેમાં એડવોકેટ ઉપેન્દ્રભાઈ ભટ્ટ, એડવોકેટ બકુલભાઈ પારીખ, એડવોકેટ શૈલેષભાઈ દેસાઈ, એઆઈએફટીપીના પૂર્વ નેશનલ સેક્રેટરી જનરલ એડવોકેટ સંતોષ ગુપ્તા, NEC સભ્ય તથા પૂર્વ નેશનલ ટ્રેઝરર એડવોકેટ ભાસ્કર પટેલ, NEC સભ્ય એડવોકેટ જયેન્દ્ર તન્ના સહિતના મહાનુભાવો ઉપસ્થિત રહ્યા હતા.
ટેકનિકલ સત્રો ઉપરાંત કાર્યક્રમ દરમિયાન પ્રતિભાગીઓને પરસ્પર નેટવર્કિંગ, વ્યાવસાયિક ચર્ચાઓ અને દીવના રમણીય પ્રવાસન સ્થળોની મુલાકાતનો પણ લાભ મળ્યો હતો. શૈક્ષણિક જ્ઞાન, વ્યવસાયિક વિકાસ અને મિત્રતાભર્યા વાતાવરણનો સુંદર સમન્વય આ કાર્યક્રમમાં જોવા મળ્યો હતો.
આયોજકોએ તમામ વક્તાઓ, તમામ ડેલીગેટ્સ તથા ફ્લેમિંગો ક્લબ એન્ડ રિસોર્ટના તથા હોટેલ હેમલ ગાર્ડનના સંચાલનનો આભાર વ્યક્ત કર્યો હતો. કાર્યક્રમની સફળતાએ AIFTP દ્વારા ટેક્સ પ્રોફેશનલ્સ માટે સતત શિક્ષણ, જ્ઞાનવર્ધન અને વ્યાવસાયિક એકતાને પ્રોત્સાહન આપવાની પ્રતિબદ્ધતાને વધુ મજબૂત બનાવી છે.
દીવ ખાતે યોજાયેલ આ રેસિડેન્શિયલ રિફ્રેશર કોર્સે ભાગ લેનાર તમામ પ્રતિનિધિઓને જ્ઞાન, અનુભવ અને સંસ્મરણોની અમૂલ્ય ભેટ આપી છે અને ભવિષ્યમાં આવા વધુ ગુણવત્તાસભર કાર્યક્રમો માટે પ્રેરણારૂપ બન્યો છે. ભવ્ય પોપટ, ટેક્સ ટુડે.
