GSTAT અપીલ ફાઇલિંગમાં મોટી રાહત: જાણો ‘ટોકન સિસ્ટમ’ શું છે અને તે શા માટે મહત્વપૂર્ણ છે?

-By Darshit Shah, Adovocate

GST એપેલેટ ટ્રિબ્યુનલ (GSTAT) માં અપીલ દાખલ કરતા કરદાતાઓ માટે એક મહત્વપૂર્ણ સમાચાર છે. GSTAT દ્વારા ૧૦ જુલાઈ ૨૦૨૬ ના રોજ ‘ઓર્ડર નંબર 156/2026’ બહાર પાડવામાં આવ્યો છે, જેમાં અપીલ ફાઇલ કરવા માટે એક નવી ‘ટોકન સિસ્ટમ’ (Token Mechanism) રજૂ કરવામાં આવી છે. જે કરદાતાઓને ઓનલાઈન પોર્ટલ પર ટેકનિકલ સમસ્યાઓનો સામનો કરવો પડી રહ્યો છે, તેમના માટે આ સિસ્ટમ ખૂબ જ ફાયદાકારક છે.

 • સમય મર્યાદાની સુરક્ષા (Protecting the Timeline): GSTAT માં અપીલ કરવાની છેલ્લી તારીખ ૩૧ જુલાઈ ૨૦૨૬ સુધી લંબાવવામાં આવી છે. જો તમે ૩૧ જુલાઈ ૨૦૨૬ કે તે પહેલાં ટોકન જનરેટ કરી લો છો, તો તે સરકારમાં નોંધાય છે કે તમારો અપીલ કરવાનો ઈરાદો (intent to file) હતો.

• વિલંબ ફી (Delay Fee) માંથી મુક્તિ: જો પોર્ટલની ખામી કે અન્ય કોઈ ટેકનિકલ સમસ્યાના કારણે તમે સમયસર અપીલ ફાઇલ ન કરી શકો, અને તમારી પાસે માન્ય ટોકન હશે, તો તમને વિલંબ ફી ભરવામાંથી મુક્તિ મળશે.

 • સરળ શબ્દોમાં કહીએ તો, ૩૧ જુલાઈ પહેલા મેળવેલું ટોકન એ નિયત તારીખમાં અપીલ દાખલ કરવા માટેનું “પર્યાપ્ત પાલન” (sufficient compliance) માનવામાં આવશે.

• ૬૦ દિવસની મુદત: ટોકન જનરેટ કર્યાની તારીખથી ૬૦ દિવસની અંદર તમારે તમારી સંપૂર્ણ અપીલ (actual filing) દાખલ કરવી ફરજિયાત છે.

• ⁠ટોકન રદ થવું (Lapse): ૬૦ દિવસ પૂરા થયા પછી આ ટોકન આપોઆપ રદ (lapse) થઈ જશે, અને ત્યારબાદ તેના આધારે કોઈ ફાઇલિંગ સ્વીકારવામાં આવશે નહીં.

• ⁠દરેક અપીલ માટે અલગ ટોકન: જો તમારે એક કરતા વધુ અપીલ દાખલ કરવાની હોય, તો દરેક અપીલ માટે અલગ ટોકન જનરેટ કરવું પડશે. એક ટોકનનો ઉપયોગ બહુવિધ અપીલો માટે કરી શકાશે નહીં.

• ⁠માહિતીની ચોકસાઈ: જો ટોકન જનરેટ કરતી વખતે અધૂરી કે ખોટી માહિતી આપવામાં આવશે, તો તે ટોકન રદ (Void) ગણવામાં આવશે. આથી અપીલકર્તાઓએ ખૂબ જ સાવચેતી રાખીને ફોર્મ ભરવું.

• ⁠ખાસ નોંધ: ટોકન માત્ર તમારી ફાઇલિંગની સમય મર્યાદાને સુરક્ષિત કરે છે, તે સંપૂર્ણ અપીલ ફાઇલિંગનો વિકલ્પ નથી.

GSTAT પોર્ટલ (https://efiling.gstat.gov.in) પર જઈને નિર્ધારિત ફોર્મમાં જરૂરી માહિતી ભરવાની રહેશે. જો તમારી પાસે અપીલનો ઓર્ડર ઓનલાઈન ઉપલબ્ધ હોય, તો ૧૬-આંકડાનો ARN/CRN નંબર આપવાનો રહેશે અને જો ઓર્ડર ઓનલાઈન ન હોય તો ઓર્ડર/રેફરન્સ નંબર અથવા ફાઇલ નંબર આપવાનો રહેશે. સફળતાપૂર્વક ફોર્મ સબમિટ કરવાથી તારીખ અને સમય સાથેનું એક ‘ટોકન ID’ જનરેટ થશે.

કરદાતાઓ માટે સલાહ: તમામ કરદાતાઓ અને તેમના પ્રતિનિધિઓને અપીલ કરવામાં કોઈ અડચણ ન આવે તે માટે વિનંતી છે કે તેઓ ૩૧ જુલાઈ ૨૦૨૬ પહેલાં પોતાનું ટોકન જનરેટ કરી લે અને તેની નોંધ (રેકોર્ડ) પોતાની પાસે સુરક્ષિત રાખે.